Introvert Speaks

An introvert in many a case is self-obsessed with his feelings. He feels that his feelings are of high importance and he is doing a great job in controlling the outflow of his emotions. I have tried to draw a parallel between his assumption of his heart and an ocean..

Aaj saagar ka dil bechain hai..

Uske seene par tairti bedhab karobaari naavon

Aur pyar ki har sundar kashti

ki saansein atak gayi hain..

Aaj saagar ka dil bechain hai

Aaj na jaane kya hoga..

Apaar ka vistaar jaise,

Khud mein hi simat gaya hai.

Sab kuch kitna khamosh ,

Kitna chup-chaap sa ho gaya hai.

Aaj na jaane kya hoga..

Havayon ke vaeg ne,

Lehron ke ghor garjan ne

Achanak hi panaah le li hai,

Dara dene vale sannate mein.

Aaj na jaane kya hoga..

Chuppi saadhe, haathon ko baandhe,

Sir jhukaye khadi kaaynat ko

Ek sehmi si aashanka hai,

Is khamoshi ke garbh se

Aise tuufan ke aane ki

Jo sab kuch tabaah kar dega..

Kya saagar aakhirkaar

Apna baandh kho dega?

Apni seemayen tod dega?

Haan, shayad tod hi dega.

Aakhir baandh ki bhi to

ek seema hoti hi hai.

Par shayad aisa naa bhi ho.

Kyun saagar ne khud hi to

Apne ko seema mein baandha hai.

Varna prakriti mein kaun hai bhala,

Jo apaar ko band le..

Aaj saagar ka dil bechain hai,

Aaj na jaane kya hoga.

Kayaas sabhi laga rahe hain,

Jabki yeh sabhi jaante hain

Ki kuch nahi hone vala.

Uska yeh dukh bhi

aseem gehraiyyon mein dafan ho jayega.

Is baar bhi saagar

ek gehri saans lekar reh jayega..

Saagar kabhi rota nahi,

Vo dard-bayaani nahi karta.

Vo dukh mein ghutega,

Par seemabaddh rahega.

Yehi to uska sabse vaada hai..

Uska vaada kabhi tuut-ta nahi,

Uska dheeraj kabhi chuut-ta nahi.

Vo saagar hai,

Saagar kabhi duubta nahi.. .